कर्तबगार तहसीलदारांचा मृत्यू, सांगली जिल्हा हळहळला

विटा, प्रतिनिधी    शिरसगाव ता. कडेगाव येथील मूळ रहिवासी असलेल्या शीतलकुमार खाशाबा यादव (वय -४२) या तहसीलदारांचे अल्पशा आजाराने  दुर्दैवी निधन झाले आहे.  सध्या ते कोल्हापूर येथे तहसीलदार म्हणून सेवेत रुजू होते. त्यांच्या निधनामुळे सांगली जिल्ह्यात हळहळ व्यक्त होत आहे

    तहसीलदार शीतल यादव यांचे  प्राथमिक व माध्यमिक शिक्षण कवठेमंकाळ येथे झाले. त्यानंतर त्यांनी राजारामबापू कॉलेज साखराळे येथून  बी.ई.ची पदवी घेतली . सन 2007 मध्ये राज्य सेवा आयोगाच्या माध्यमातून त्यांची नायब तहसीलदारपदी निवड झाली होती.  त्यांनी  नागपूर, गोंदिया आणि पुणे विभागीय कार्यालयात नायब तहसीलदार म्हणून काम पाहिले होते. सांगली जिल्ह्यातील शिराळा  येथे दोन वर्षापूर्वी तहसीलदार  म्हणून नियुक्ती झाली होती तर सध्या कोल्हापूर येथे तहसीलदार म्हणून ते सेवेत होते.

 काल बुधवार ता. ५ रोजी अल्पशा आजाराने  त्यांचे आकस्मिक निधन झाले. एक कर्तव्यदक्ष, प्रामाणिक अधिकारी म्हणून सांगली, कोल्हापूर जिल्ह्यात त्यांची ख्याती होती. त्यांच्या निधनामुळे कडेगाव, कवठेमंहकाळ  तालुक्यासह जिल्हाभरातून दुःख  व्यक्त होत आहे. तहसीलदार शितल यादव हे सेवानिवृत्त शिक्षक खाशाबा यादव यांचे पूत्र तर घानवड ता खानापूर येथील  सेवानिवृत्त केंद्रप्रमुख अर्जुन यादव , नामदेव यादव , रामचंद्र यादव, आनंदा यादव यांचे ते  पुतणे होत.

 तहसीलदार कै. शितल यादव यांच्या पश्चात आईवडील, पत्नी, सात वर्षाची मुलगी, भाऊ, चुलता, चुलती, बहिणी असा मोठा परिवार आहे. बुधवार ता. ५ रोजी कवठेमंहकाळ येथे त्यांच्या पार्थिवावर अंत्यसंस्कार केले. शुक्रवार ता. ७ रोजी कवठेमंहकाळ (जि.सांगली) येथे सकाळी ८.३० वाजता  रक्षाविसर्जन होणार आहे.